Молитвы

1.

Къ кому возопію, Владычице, къ кому прибѣгну въ горести моей, аще не къ Тебѣ, Царице небесная? Кто плачъ мой и воздыханіе мое пріиметъ, аще не Ты, пренепорочная, надеждо христіанъ и прибѣжище намъ, грѣшнымъ? Кто паче Тебе въ несчастіяхъ защититъ? Услыши стенаніе мое и приклони ухо Твое къ моленію моему. Владычице, Мати Бога моего, не презри требующаго Твоея помощи и не отрини мене, грѣшнаго, вразуми и научи мя, Царице небесная, не отступи отъ мене раба Твоего, Владычице, за роптаніе мое; буди мнѣ мать и покровительница! Вручаю себя милостивому покрову Твоему, аще токмо восхощеши устроити о мнѣ; приведи мя, грѣшнаго, къ тихой и безмятежной жизни, да плачуся о грѣхахъ моихъ. Увы мнѣ! Къ кому прибѣгну, повинный азъ, аще не къ Тебѣ, упованію и прибѣжищу грѣшныхъ, въ надеждѣ на неизреченную милость Твою и щедроты. Кое ли слово за преступленіе мое изрещи возмогу къ величеству славы Твоея? О, Владычице, Царице небесная! Ты мнѣ мати и надежда, Ты мнѣ упованіе и прибѣжище, покровъ, заступленіе и помощь! Царице моя преблагая и скорая заступнице! покрый Своимъ ходатайствомъ мое преступленіе, защити мене отъ врагъ видимыхъ и невидимыхъ, умягчи сердца злыхъ человѣкъ, возстающихъ на мя. О, Мати Господа моего Творца! Ты корень дѣвства и неувядаемый цвѣтъ чистоты. О, Богородительнице! Ты подаждь мнѣ помощь, немощствующему плотскими страстями и болѣзнующему сердцемъ: едино бо Твое и съ Тобою Твоего Сына и Бога нашего имѣю заступленіе; и Твоимъ пречуднымъ заступленіемъ да оправданъ буду и избавлюся отъ всякія бѣды и напасти, — всесильными Твоими молитвами, всечистая, непорочная и преславная Божія Матерь Марія. Радуйся, благодатная; радуйся, обрадованная; радуйся, преблагословенная, Господь съ Тобою!

3.

О, Пресвятая Дѣво, Мати Господа Вышняго, всемилостивая Заступнице и Покровительнице всѣхъ, къ Тебѣ съ вѣрою прибѣгающихъ! Призри съ высоты небесныя славы Своея на мя, припадающаго къ подножію Твоему, услыши смиренную молитву мене, грѣшнаго и недостойнаго раба Твоего, и принеси ю предъ возлюбленнаго Сына Своего. О, Преблагословенная Богородице! Ты, именуемая всѣхъ скоропослушница и скорбящихъ радосте, усдыши и мене скорбнаго; Ты — утоленіе печали, утоли и моя душевныя болѣзни и печали; Ты — купино неопалимая, сохрани міръ и всѣхъ насъ отъ вредоносныхъ огненныхъ стрѣлъ вражіихъ; Ты — взысканіе погибшихъ, не попусти мене погибнути въ безднѣ грѣховъ моихъ; Ты цѣлительница страждущихъ, исцѣли и мене, уязвленнаго отъ немощей душевныхъ и тѣлесныхъ; Ты — нечаянная радосте, радостію спасенія Твоего отъемли отъ мене страхъ грядущаго мученія; Ты — споручница грѣшныхъ, буди и мнѣ, грѣшнику, благосердою споручницею покаянія и спасенія моего. На Тебе по Бозѣ все мое упованіе возлагаю, буди ми выну неусыпная ходатаица и всесильная предстательница предъ Сыномъ Твоимъ, Господомъ нашимъ Іисусомъ Христомъ, укрѣпи во мнѣ вѣру въ Него, утверди въ любви Его, научи мене любити и славити и Тебе, Пресвятую Матерь Божію, Преблагословенную Марію: вседержавному покрову Твоему, Богородице, вручаю себе на вся вѣки. Аминь.